29 يوليو 2008

رأي الناس

رأي الناس

علمني من فضلك

تعلمت منذ زمن طويل ألا أتغاضى عن كلمة سمعتها و لم أفهم معناها ، اعتدت أن أدون ملاحظة بها ثم أبحث عن معناها عندما تتاح لي الفرصة ، و كان هذا الأسلوب يضمن لي أن أتعلم كل يوم شيئا جديدا ، فما أكثر الحوارات و الاجتماعات التي أحضرها و أسمع فيها شيئا ما لم أكن أعرفه من قبل .

منذ وقت ليس بالطويل كنت أحضر أحد الاجتماعات عندما وجدت صديقي يرفع يده في أثناء النقاش و يسأل أسخف سؤال ممكن ، توزعت على وجوه الحاضرين نظرات بين استنكار و استخفاف ، بينما اكتفيت أنا بنظرة استفهام لأنني أعلم تماما براعة صديقي و سعة اطلاعه ، و ابتسم هو و قال ببراءة :

Its better to be dumb for a few minutes than to be dumb forever

فهمنا ما يقصده ، فالسؤال مهما بدا ساذجا أو سخيفا في هذا التوقيت إلا أنه سيتلقى إجابة ، و لن يكون على صديقي أن يطرح السؤال مرة أخرى ، أو أن ينتظر حتى يبحث عن إجابة لسؤاله بنفسه .

وجدت أن أسلوب صديقي يعتمد على طرح التساؤل في لحظة اكتشاف الحاجة للسؤال ، و تحمل رد فعل الآخرين ، بينما كنت أنتظر أنا ، و أتحمل تأخر الإجابة حتى تتسنى لي معرفتها . كانت مزايا أسلوب صديقي أنه يتعلم ما يجهله في الحال ، و يستفيد من معرفته هذه فورا ، و كانت مزايا أسلوبي أنني لا أعرض نفسي لرد فعل أكرهه ، و أنني أستطيع أن أعرف ما أريد بالقدر الذي أحتاجه ، و بدأت أفكر في أنسب المواقف لاستخدام أيا من الأسلوبين .

قررت أن أجرب أسلوب صديقي في السؤال عما أجهله فورا ، و حاولت فعلا ، و لكنني وجدته أسلوبا صعبا ! و اكتشفت أنني لا أحب هذا الأسلوب لأنني أخاف من رأي الناس ، و رغم أنني لم أكن أعاني من مشكلة في الاعتراف بأخطائي ، إلا أنني وجدتني أتأثر برأي الناس بشدة .

رأي الناس

كنت أعلم أن رأي الناس يعتمد في الأساس على مظهري ، و أسلوب كلامي ، ثم بمحتوى ما أقول ، و أخيرا بأفعالي ، و من العجيب أنك تجد الشخص المنمق صاحب المجاملات و الكلام الجميل هو الشخص صاحب الشعبية الأعلى ، بل و قد يفوز بثقة العديدين ، و يحب الكثيرون عادة أن يرضوه لأنهم يحبون أن يسمعوا منه حلو الكلام .

فهمت فيما بعد أن رأي الناس يتكون بسرعة من خلال المظاهر و الانطباعات ، ثم يتغير هذا الرأي و يتبلور مع الوقت و زيادة المعرفة ، و من خلال المواقف و ليس الكلام . و يسهل أن ترى من الناس من يطفو سريعا على السطح بسبب مواهبه الاجتماعية ، و لكن لا تلبث أن تتضح المواقف و أصحابها ، و يتميز أهل الثقة .

و اليوم مازلت أرى أن الانطباع الأول هام ، و أن رأي الناس السطحي مؤثر ، و لكنه ليس الأساس ، و أن الأفضل أن أكون نفسي ، و خير لي أن أبني ثقة من حولي خطوة بخطوة .

إن نظرة مدققة لمجتمعنا تظهر اهتماما مبالغا فيه لرأي الناس ، و بالتالي اهتمام بالمظهريات و القشور على حساب الحقيقة و المضمون ، و لعل كثير من آفات مجتمعنا و مشاكله تتعلق برأي الناس .

...

و حتى اليوم مازلت أحاول أن أمزج بين أسلوبي التعلم للحصول على أفضل نتيجة . و لكن ماذا عنك أنت يا صديقي ؟ هل سبقتني في هذا المجال ، أم أنك مازلت تتحسس خطواتك مراعاة لرأي الناس ؟

* اللوحة للفنان محمد حجي

...

تحديث : أشكر جميع الأصدقاء الأعزاء على تعليقاتهم ، و أظن أن هذه التعليقات تضم اضافات للموضوع لا حصر لها ، و أنصح كل من اهتم بموضوع المقالة أن يتابع التعليقات أيضا .

تحديث : أصداء رأي الناس صديقتي و النت في مدونة يوميات أم البنين

هناك 46 تعليقًا:

norahaty يقول...

السلام عليكم ورحمة الله وبركاته
أ.احمد
رأى الناس مهم للغاية ,ومهما حاولنا إنكار هذا او نفيه فهو غير صحيح.
نعم ياأستاذ الانطباعات الاولى تدوم بما لاشك فيه(على الاقل بالنسبة لى)وتغير هذا الانطباع الاول يحتاج الى جهد من صاحبه ووقت قد لا يتوافران لى او له ,وقد اخسر او اكسب بهذا الانطباع الاول المستمر ولكنه (الطبع)الصعب بل الغير قابل للتغير مهما حاولت.
تشكراتى واحتراماتى لكلامك وافكارك وموضوعاتك ياأستاذ احمد.

وميض ابتسامة يقول...

عزيزى احمد

بصراحة الموضوع جميل ويهم كل الناس

ولكن انا أرجح اسلوبك الاول فى المعرفة والتتبع..فالمعرفة من بحر هادىء خيرا عندى من معرفة بحر ثائر بل وأعمق تأثيرا..

وماهو وجه الاستعجال فى معرفة المعلومة المصاحبة لردود أفعال قد لا أقبلها

أما عن رأى الناس فهو خاضع بالدرجة الاولى لمبدأ القبول .. وهو ما يعنى رأى الناس فيك من أول نظرة.. وأول لحظة بل وقبل أن تتكلم أحيانا
ويأتى الكلام فى المرتبة الثانية فالحكمة القديمة تؤكد هذا المعنى " تكلم لأراك "

أما عن حب الناس لشخص محدد بالذات فهذه كاريزما اصحاب المستوى الرفيع من بعض البشر

واخيرا شكرا لسعة صدرك ..والسلام

نعكشة يقول...

هوه حضرتك اتكلمت علي كذا محور انا مخي اللي مركزش عامتاً هتكلم عن اللي فهمته ولو مفهمتش حاجة يا ريت حضرتك توضحلي
بالنسبة لبداية الموضوع المقارنة بين اسلوب حضرتك و اسلوب صديقك

فيه مزايا لدة و فيه مزايا لدة

مزايا انك تسأل في ساعتها : انك هتكمل باقي النقاش وانت فاهم
مش هتبقي قاعد ومش هتستفيد حاجة من المجلس

طيب مزايا التاني اية : ان فترة نسيانك للحاجة تكاد تكون قليلة

اذكر ان الحاجات الل كنت بحاول اتعلمها بنفسي او اسعي انا لاستخراجها لسة ثابتة ف يالزاكرة
بينما الاسئلة العابرة اللي سألتها عشان اقدر افهم الحوار بيدور علي اية مش فاكرة اجاباتها

.............


بالنسبة لرأي الناس

انا من الناس اللي بتعطي رأي او الانطباع الاول بناء علي المظهر

إلا ان الانطباع الاول كما قلت لا يدوم او يتبلور مع معرفة الشخص نفسة

انا عن نفسي من الناس اللي متقلبة جداً

ساعات اهتم جداً لرأي ناس
و ساعات ميكونش رأيهم ليه أي لازمة في حياتي

مش علي حسب الموقف
ولكن علي حسب نفسيتي المتقلبة

...............

تسلم علي طرح الموضوع للنقاش

دمت سالم
سلامٌ عليك

ام يحيي يقول...

أظنني أفضل الاسلوب الاول .. اسلوب

البحث بنفسي عن المعلومة طالما ان

فرصة التوصل اليها متاحة



الا ان البعض قد يفضل الاسلوب الثاني

في حالات معينة .. من باب تأديب

النفس مثلا اذا تصورت العلم بالاشياء

وتفاخرت امام الناس بذلك

جزاك الله خيرا .. موضوع شيق

محمد عبد الغفار يقول...

فشلت فى منع نفسى من التلفظ بلفظة

طظ

عندما يراودنى عقلى حول راى أغلب الناس

appy يقول...

طيب اقولك من غير زعل
الناس اصلا نااااااادر لما تلاقى منهم راى صح او حقيقى دايما الزم يجاملوا
نفسى حد يقولى انتى وحشه فى كذا يعنى مش يخبطها فى وشى
بس براحه انما اسال اى حد لا ده هايل ده شنيع
فبسكت وخلاص

مصــــري..!! يقول...

السيد " أحمد"

الحقيقة اني ومعظم أبناء جيلي لا يهمهم رأي الناس بتاتاً.

في الدراسة يمكن أن أكون أشبه بأسلوب سيادتك وهذا لعدم ثقتي في معظم الأساتذة - الداكترة - وهذا ليس من باب الغرور ولكن من باب كراهيتي لشئ اسمه التعليم المصري.

ولكن ان كان الذي سيقول رأيه شخص وانسان من طراز سيادتك فالسمع كل السمع والطاعة كل الطاعة مع وضع الأمر تحت التفكير البسيط.
ليست مجاملة ولكني لست أعرف مدونتك اليوم.

تحياتي
أسامة

رشا عبد الرازق يقول...

تحياتي لك :)
الأمر نسبي بكل تأكيد وبالتجربة مرارا وتكرارا يتحول إلى رد فعل تلقائي حسب الحالة
بمعنى
إذا كان السؤال او إبداء الرأي الذي قد يبدو ساذجا او يحدث اختلافا سلبيا عند الناس فيدخل رد الفعل بداية في منطقة اختبار بسيطة عن من هم هؤلاء الناس وما مدى تأثرك برأيهم وما الأجدى لك أن تطرح تلك السذاجة لحظتها ام تنتظر
ولمزيد من التوضيح كمثال :
بين الأصحاب ممن تقاس علاقاتك بهم بالمعرفة الطويلة والعشرة قد يبدو الحصول على الاجابة اللحظية شيئا عاديا بل وممتعا في بعض الحالات
لكن لنفترض ان حضور هذه اللحظة كان في ساحة مرؤوسيك مثلا مما يهددك بطرحك في شيء من الثقة والتي أنت مصدرها بالنسبة لهم فأظن عندها يكون التروي منطقيا لحصد نتيجة مزدوجة !

شكرا لمقالك الثري ولك أصدق تقديري :)

صباح الخير يا مصر يقول...

رحايا العمر
*************
الانطباع الاول فى هذه الايام قد يكون مؤذى اذا اعتمدنا عليه للحكم على الاخريين...و ذلك نظرا لما يعرفه البعض و يتأكدون منه فيما يخص اهمية الانطباع الاول فى تكوين رأيهم
فنجد من احترف هذا السلاح لايصال الانطباع الذى يريده عند الاخريين و ذلك باستخدام رسائل قصيره متنوعه مثل نوع البس اللى هو لابسه او نوع الساعه فى معصمه او رأيه فى احداث معينه او الزج ببعض الكلمات او المصطلحات وهكذا..
لذلك فانى اثق فى ضرورة اخذ الوقت المناسب لاكتشاف الاخريين و التدريب على اكتشاف الاقنعه التى يرتديها الاخريين بدلا من الاخذ بالانطباع الاول هذه الايام ومحاولة استخدام البصيره و ليس البصر قد ىكون آمن اكثر

مماسبق اراك قد اكتشفت اننى اشترك معك فى اسلوب تأجيل الاسئله

تحياتى ياباشمهندس أحمد

kochia يقول...

جربت زمان استني المعلومة تيجي
وبتيجي
بس ساعات متاخر اوي
وبيفوتني في قطر الحياة مواعيد كتير
لاني معرفتش اسال

اتعلمت بعد كدة اسال
ساعات ببقي عارفة وبسال
زيادة تاكيد
الثقة في المعلومة بتطمئن اوي

دلوقتي بعد ما مرنت نفسي علي الاسلوب التاني تمام
بقيت بمزج بين الاتنين
اميل لاسلوبي القديم واستخدمه
ولكن عن اللزوم والحاجة
يبقي
Its better to be dumb for a few minutes than to be dumb forever

ومش بهتم براي الناس لانهم في النهاية هيسقفولي لو وصلت

تحياتي

Mohamed يقول...

salamo alikom,
It depends on the situation , if you won't be able to continue the discussion or it will prevent you from following up or giving the right advice you have to ask immediately other wise I prefer to wait and get it myself.

freedom يقول...

كلامك صحيح
بس التعلم لوحدك افضل من سؤال احد
لأنه ستبقى كوصمة عار في مجتمعاتنا
هيك تعلمت
ما بتسأل حدا سؤال الا و بكون جوابه كانه عالم بالموضوع و متخصص

fire bird يقول...

بصراحة يا استاذ احمد

حضرتك اثرت نقطة مهمة جدا

راى الناس

دا فعلا بيشكلى مشكلة جامدة جدا

لانه بياثر فيا بشكل كبير جدا

وان كنت احيانا بتخطاه

لكن فى معظم الاحيان بيكونوا جزء اساسى فى قراراتى

ومتهيالى صعب اتجاهلهم فى بعض القرارات

مش عارفة

اتمنى فى يوم اكون زيك كده

بثينــــــة يقول...

أستاذ أحمد
أنا بافضل الأسلوب الهادئ والسؤال غير المتعجل لأني لا أتحمل نظرة أو لفظ غير مناسب .. ولو أني في أحيان كثيرة بالاقي نفسي مش مهتمة برأي الناس اللي مش بيعجبهم حاجة بس دة مش بيبقي في حالة سؤال معرفي لكن بيبقي قرار أو فعل معين

فاكر قصة جحا وابنه والحمار
:D
علي فكرة أولادي هم كدة .. نموذج صارخ للحالتين
هي بتفكر الأول وتحلل وتقلب الكلام في دماغها وتوزنه وهكذا
بينما هو .. اسمه في البيت
Mr.direct
:D

مشتاق لله يقول...

بارك الله في قلمك, قلي حينما تكتب فيما تفكر؟

محمد فوزي يقول...

إعتذار وشكر وتعليق

طبعا واضح من العنوان ( وانا أول واحد يحط عنوان للتعليق على فكره ) إنه هيكون تعليق طويل هااا عندك إستعداد ؟ أوكييي !!

أولا إعتذار لأني بعد تعليقك عندي حصلتلي ظروف شخصيه وبعدها دخلنا في موضوع العباره وعلى ما الواحد خرج من الحاله النفسيه الضاد كان الوقت إتأخر قوي للتعقيب على تعليقك لكن انا إستفدت منه على كل حال

ثانيا شكر إنك خلتني مع المدونات اللي في القلب في قائمتك وده شرف لي يا احمد باشا


ثالثا تعليقا على موضوعك الهايل
إعجاب الناس جائزه لا أسعى إليها وسخطهم تهمه لا أهرب منها, وموضوعك ده فكرني بجمله قريتها لكاتب أمريكي بيقول فيها (كيف نعبر عن جهلنا الذي يلزمنا لنمو عقلنا إذا كنا نستخدم معرفتنا طوال الوقت ؟)

تحياتي وتمنياتي بدوام التواصل

شــــمـس الديـن يقول...

السلام عليكم

اسمح لي استاذي الفاضل ان اخرج عن موضوع التدوينة هذه المرة لابدي اعجابي الشديد بالاهتمام بالمدونة دا لانك فعلا حاطط فيها حاجات اول مرة اشوفها زي الاجزاء المتاخدة من المقالات و ادخال الميل لمتابعة المدونة حتي ال فييد اللي تحت دا شكله جديد عليا - و كمان حرصك علي تشجيع و نشر نوع من الفنون الصورة اللي بتحطها في التدوينة

ندخل في الموضوع
حضرتك هذه المرة تانقش اشكالية اخري من اشكاليات الاهتمام برأي الناس

شوف
موضوع السؤال دا انا اذكر ان كان لينا في المدرسة زميلة بتقعد تقاطع المدرس و تسئل اسئلة خنيقة فعلا , و الناس كلهم كانوا بيستخنقوا البنت دي و محدش كان بيحاول يصاحبها

رأي الناس مهم الي حد ما لكن مش هو اساس الحياة

عامة انا اتعودت علي شئ , انا بتعامل باسلوبي و لكن في نفس الوقت لا استعدي الناس

لان فيه ناس مفتعرفش تفرق و بتظن ان علشان يكون ليها شخصية و كدا بتعمل سلوكيات تناهض بيها الناس عامة و بتبقي منبوذة او شعبيتها مش كويسة

و فين ناس تانية علي طرف النقيد بتقع في هوية انها تكون عبده لكلام و انطباع الناس عنها و ممكن تعمل قرد لو دا يعجب الناس

الخلطة انك تعامل الناس بشخصيتك و تحرص عليهم و لكن دون ان تضيع فيهم ... و دا الناجين بس اللي بيعملوه و مش كل ناس قادرة عليه

تدوينة ثرية كالمعتاد :)

دمت بكل الخير

عدى النهار يقول...

بالنسبة لرأى الناس.. أعتقد إنه بيكون فى أغلبه ناشىء عن تدخل إعتياد الناس على التدخل فيما لا يخصهم. يعني المجتمع اللي الواحد بيفقد فيه إحساسه بالخصوصية وبيعتاد منذ الصغر على التدخل فيما لا يعنيه من أمور الغير من الطبيعي أن يكون رأي الناس له أولوية فى حياته وممكن يفعل ولا يفعل بناء على توقعه لرأي الناس. أمراض إجتماعية متشابكة مع بعضها عاملة زي بكرة الخيط علشان تعرف بدايتها لازم تفك حيط البكرة كله
:)

fahd يقول...

بص يا اخي

انا بحب لما اعلق عن حد يكون عندي تعقيب او اضافة للموضوع
لكن الان داخل اقولك ايه الحلاوة دي

طبعا انت مش بتحب ده

لكن هقولهوك لاني مش عارف اوصلك ازاي

مش عارف انت ساكن فين
انهي شعبة يعني
ثم اميلك

اريد ان اتواصل معك يا اخي


حاجه تانية

انا خايف علي مدونتي بعد الجواز

بصراحة كده زوجتك مش بتغير من مدونتك

تعتبرها ضرة مثلا

ولا ازاي بتجمع بينهم

ودمت سالما وامنا

اميلي اهو ياريت تضفني عندي او تراسلني
صعب الواحد يقابل واحد مثلم ثم يمر كان لم يري

fahdebnyonis@yahoo.com

Basma يقول...

الأستاذ الفاضل أحمد
مقالك قد اصاب موقف مباشر لي تلك الأيام لذلك تابعت التعليقات باهتمام شديد
رغم ثقتي الشديدة بنفسي إلا أن أراء الناس قد توقفني مع نفسى وتعطلني أحيانا كثيرة... لأراجع نفسي
المشكله عندي جزئان الأول هو أنه بمجرد أن أستمع لرأي مخالف لنمط تفكيري أبدأ وبسرعة شديده دون أدني تفكير في الدفاع عن منطقي
مما يؤدي إلي خسارة الجولة الأولي بسبب الأنفعال ليتحول الموقف من صاحب حق إلي محقوق
أبتعد لأفكر في الكلمات وسياق الموقف وأجد أني كنت محقة من البداية وتجنبا لنقاش أجديد أغلق الموضوع وأقرر أنني في المرة القادمة سوف أتمهل حتي لا يضيع طرحي البناء مقابل لحظات الانفعال
ثم يحدث الأمر بحذافيره كما حدث من قبل ولا استطيع الصمود أمام رأي مغاير أولشخص أحس أنه ربما لم يفهمني بطريقتي
بل والأكثر كارثية أن بعض من يهمونني قد وضعوا لي قالبا لا يروني إلا من خلاله مهما كان رأي بعد ذلك ايجابيا أو هاما أو فعالا
ثانيا لو كان الموضوع في مجال العمل لكان الفيصل هو القوانين والبراهين ولكن صعوبه الموضوع أنه يتطرق إلى المعاملات الشخصيه والمواقف المحورية في الحياة

تحياتي

بنت القمر يقول...

احمد كمال
==========
ها اقولك رأيي اللي هو من ضمن رأي الناس
في ناس ومحيط اجتماعي رأيهم مهم ولازم تحصل علي رضاهم زي محيط العمل مثلا
لازم تكون شيك وحاطط برفيوم وحالق او موضب دقنك:) وهدومك شيك وكمان تكون لبق ومجامل وودود وهنا اتذكر مثل انجليزي علي ما اعتقد بيقول الوجه الجميل خير كارت توصيه لصاحبه
يعني لازم تكون مقبول اجتماعيا في الوسط ده عشان تنجح والمظهر ليه عامل مهم
ممكن بقا تنشف دماغم لكن متلومش الا نفسك
ممكن تعيش بافكارك ومفاهيمك لو الوسط اللي انت فيه مش هام ولا مؤثر بالنسبه ليك زي الاهل مثلا يعني مامتك مراتك دول ناس مضطرين يستحملوا تقلبات شخصيتك ومظهرك لان عامل الحتميه والاجبار هنا بيدخلوا في المعادله:((
بالنسبه بقا للاهتمام بالمظهر والحفلطه الاجتماعيه فهي بتكون برضه سلاح زو حدين وخصوصا للمرأة يعني لو واحده ربنا اداها شويه جمال وكانت بتحب اللبس والشياكه واستايل وكده فانها صحيح ها تكون محط اعجاب الاخرين وها تكون ناجحه لكن في نفس الوقت ها تكون موضع حسد وغيرة
والراجل برضه لو لبس جاكيت غالي وساعه شيك وكنت راجل خطير كده ممكن الاخرين ينظروا الي بطرف حاسد ويترجموا ده بنوع من العوجان والتناكه رغم انك بتكون عاوز نوع من القبول الاجتماعي مش اكتر وهنا الامر ينقلب الي الحكمه الخالده للعم جورج وسوف
كلام الناااااس لا بيقدم ولا يأخر
اااااا
كلام الناااااس ملامه وحيرة مش اكتر ترررا را را
يعني ذكاءك الاجتماعي بيعرفك امتي تكون شيك وامتي تكون معتدل ومين لازم تظهر قدامه ازاي؟؟
سيبك انت البس وعيش دي نظريتي واللي ها يتقلب عليك ها يكون حاقد او عنده نقص
كفايه كده بقا
سلام

Ahmed Al-Sabbagh يقول...

تحياتى وتقديرى يا باشمهندس

تدويناتك كلها بحق محترمة وشيقة

احمد

أحمد كمال يقول...

@ norahaty
و عليكم السلام و رحمة الله و بركاته ، لا شك أن رأي الناس مهم ، و لا يمكنني إنكار هذا ، و لذلك قلت "و اليوم مازلت أرى أن الانطباع الأول هام ، و أن رأي الناس السطحي مؤثر ، و لكنه ليس الأساس .." ، و ما أنتقده هو الاهتمام المبالغ فيه برأي الناس ، و الاعتماد على الانطباع الأول في تقييم الناس .

أشكرك على متابعتك المستمرة :)

@ وميض ابتسامة
أشكرك على تعليقاتك الموضوعية ، و أظن أن معرفة المعلومة في الحال تكون ضرورية إذا كانت مؤثرة في اتخاذ قرار مثلا مثلما شرح Mohamed في تعليقه ، و أتفق معك أن الانطباع الأول يتعلق بالقبول بين الناس .

أحييك مرة أخرى .

@ نعكشة
أنا متفق معك في تحليلك لأسلوب التعلم ، و بالنسبة للرأي بناء على الانطباع الأول الأفضل إنه يتأجل قليلا ليكون أدق ، و لتعطي اللي أمامك فرصة ليعبر عن نفسه بشكل أدق ، و يا ريت الاهتمام برأي الناس يكون حسب أهمية الناس دول و الثقة في رأيهم مش المود :)

أشكرك على الزيارة و التعليق

أحمد كمال يقول...

@ ام يحيي
الحقيقة موضوع تأديب النفس لم يخطر على بالي و أنا أكتب المقال ، لكن فعلا عندك حق ، جزاك الله خيرا و أحييكي على هذه الإضافة .

@ محمد عبد الغفار
هي دي أسهل حاجة الواحد "يقولها" لما يفكر في رأي الناس ، لكن صعب قوي سلوكه يبقى طظ ، و حتى أحيانا لما الواحد بيتعمد إثارة غضب ناس مثلا ، فهو في الحقيقة منتظر رأيهم الغاضب ده .

أهلا بك يا محمد في الزيارة الأولى لرحايا العمر ، أنا كنت باشوفك كتير في مدونات صديقة ، و النهارده أشكرك لأنك شرفتني هنا .

@ appy
و الله على حسب يا آبي ، يعني يا ترى هم بيجاملوكي ليه ؟ لكن أتفق معاكي إن رأي عامة الناس قلما يكون الأصح .

أنا مش حاجملك ، لكن أشكرك على متابعتك الدائمة يا فندم .

أحمد كمال يقول...

@ مصري
متهيألي يا أسامة هي مش مرتبطة بجيل قد ما هي مرتبطة بفترة عمرية ، أنا أعتقد إن كل جيل بيتمرد على رأي المجتمع و قواعده ، و بعدين بيوصل كل إنسان على حده إلى المعادلة المقبولة بالنسبة له شخصيا ، و لذلك تجد من يطلق عليه إنسان اجتماعي و آخر إنسان براوي ، في المقابل بيكون في صفات مميزة لكل فترة عمرية ، لكن مبتلاقيش جيل اجتماعي مثلا من صغره إلى شيخوخته .

و رأيك في التعليم المصري ده ماحدش يقدر يجادلك فيه ، أسأل الله أن يأذن بتغيير حاله للأفضل .

و في النهاية أشكرك على كلماتك الرقيقة ، و أتمنى أكون في يوم زي اللي انت بتقوله .

@ رشا عبد الرازق
أهلا بك من جديد يا رشا ، الحقيقة تعليقك عجبني جدا لأنه بيطرح نقطة جديدة و هي إن قرار السؤال مرتبط بمجال السؤال و مدى العلاقة بالحاضرين ، و ده صحيح فعلا بنسبة كبيرة .

تحياتي لك ، و في انتظار تعليقك دائما :)

@ صباح الخير يا مصر
يا سلام يا هندسة ، أتفق معك تماما ، الاعتماد على الانطباع وحده خطير جدا ، و كلنا تقريبا عندنا تجارب تثبت كده .

أشكرك و أحييك يا فندم :)

مع اصرارى يقول...

أنا مازلت متابع جيد لكتاباتك
ولكن ضيق الوقت يمنعنى من التعبير عن استمتاعى بما تكتب أو المشاركة فى الحوار

دمت لنا مفكرا ومنوها ومنبها ومؤثرا ومعلما يا أبو كمال

كتبت فى العاشر من رمضان أثناء ساعات العمل ولكن بعد انفراج الضغوط فى نهاية الوردية.

مع خالص تحياتى

السلام عليكم ورحمة الله

أحمد كمال يقول...

@ kochia
هو ده نفس اختياري ، لازم نستخدم الأسلوبين حسب الموقف و سرعة الحاجة للمعلومة ، و ده حيعطي أفضل نتيجة .

تحياتي لك :)

@ Mohamed
و عليكم السلام و رحمة الله ، أنا مش عارف إنت مين يا محمد ، لكن رأيك professional فعلا ، فكرتني بواحد صاحبي ، أحييك :)

@ freedom
هو التعلم لوحدك على طول مش كفاية بالتأكيد ، أنا مفترض في كلامي إننا بنسأل الشخص الصحيح ، لكن لو بنسأل الشخص الخطأ يبقى نستاهل بقى ..

تحياتي

أحمد كمال يقول...

@ fire bird
أنا كمان بتأثر جدا برأي الناس ، لكن ده مش المفروض يخليني أتصرف غلط أو أتصنع او أهتم بالتوافه و الشكليات على حساب المضمون .

أقول لك إقرأي تعليق شمس الدين على الموضوع ، عبرت فيه عن التوسط في التعامل مع رأي الناس بشكل رائع .

أشكرك على تعليقك ، و ثقتك .

@ بثينة
قصة جحا وابنه والحمار كانت على بالي من أول الموضوع برضه :) على فكرة ولادي زي ولادك بالضبط :)

تحياتي لك

@ مشتاق لله
إيه يا راجل السؤال الصعب ده ؟ بافكر في الموضوع اللي باكتبه ، و الهدف منه ، و "رأي الناس" فيه :))

أحمد كمال يقول...

@ محمد فوزي
يا خبر يا دكتور ، الموضوع بسيط خالص و مش محتاج إعتذار ، و أجمل شيء إنك تكتب بس لما تحب ، و لما يكون عندك حاجة تقولها ، و لذلك أنا ساعات بازور مدونة و أقراها و أخرج بدون تعليق إذا لم أجد ما أضيفه لأني لا أحب تعليقات تسجيل الحضور ، علشان كده خلي البساطة أساس التعامل أحسن ، و أنا يشرفني تكون في قائمة مدونات القلب .

الجملة اللي انت ذكرتها جميلة جدا ، لأن ساعات الواحد بيفتكر إنه فهم خلاص ، و الحقيقة إن دي اللحظات اللي بيكون نسي فيها قد إيه هو جاهل .
أحييك يا صديقي .

@ شمس الدين
و عليكم السلام و رحمة الله ، أشكرك كثيرا على إطراءك الرقيق ، و الحقيقة لولا المقدمة الجميلة دي كنت حطيت تعليقك في قائمة أفضل التعليقات رغم عمق و تنوع الكثير من التعليقات اللي جت على الموضوع ده بالذات ، أو حاستأذنك أحطه بس بداية من الجزء التاني ، إيه رأيك ؟

و مش حاقول غير إني أتفق معك تماما ، و أحييك على رأيك ده .

@ عدى النهار
إنت عارف إنك حطيت إيدك على جانب مهم جدا من المشكلة ، و هو سبب تأثرنا برأي الناس ، و ليه ده بيحصل في مجتمعات أكتر من مجتمعات أخرى .

تحياتي الصادقة لك على عمق الفكرة دي يا باشمهندس .

موناليزا يقول...

لا اجد مشكلة فى ان اسال عن اى شئ لا اعلمه فى الحال
يعنى مثلا ماينفعش يكون فى اجتماع فى الشغل والمدير بيقول كلام انا مش فاهماه
بسأله وقتها وقيس على ده بقى كل حاجة لانه مابيكونش فى دماغى رد فعل الناس على قد مابيكون تفكيرى انى عايزة افهم او اتعلم

نعكشة يقول...

مش عارفة بس انا حاسة ان الانطباع الاول بيبقي لا اراديا
و صراحة انا لا ارتكز عليه

بس أعرف ناس و منهم والدتي
من اول ما بتشوف الشخص بتدي انطباع و غالبا ما بيكون الصح

بالنسبة للمود

دة بيبقة لا ارادياً للأسف برضو

أنا حاسة اني ماشية كل ياتي لا اراديا :D

ههههههههههههههههههه

خير خير

معلش كركبت حضرتك معايا


سلام عليكم

أحمد كمال يقول...

@ fahd
أولا أشكرك على كلامك الحلو ، و يسعدني إننا نتراسل و نتقابل كمان ، و على فكرة عنوان الإيميل بتاعي موجود على طول في البروفايل للي عايز يراسلني ، و مع ذلك أنا حابعت لك الأول إن شاء الله ، أما بالنسبة للمقابلة فبكرة الجمعة إن شاء الله أنا حاحضر حملة المدونين للتبرع بالدم برعاية خيخة ، و حظي حايكون حلو لو قابلتك هناك إن شاء الله .

ثانيا أحب أقول لك إن الست بتعتبر أي حاجة جوزها بيعملها من غيرها بمثابة ضرة لها ، و دي ممكن تعتبرها قاعدة عامة :) مع الاعتذار لكافة الستات

@ Basma
إن الثقة في النفس يا عزيزتي إنما تعتمد على معرفتنا بإمكانياتنا و تقديرنا لذواتنا بناء على خبرات سابقة ، و ذلك بالأخذ في الاعتبار رأي الناس السابق و الحالي فينا و في قدراتنا ، و لذلك ربما يتأثر الإنسان الواثق في نفسه برأي الناس أكثر من غيره إذا كان هذا الرأي صادم له ، و مع ذلك فإن رد فعله لا يعتمد على مدى ثقته في نفسه ، و إنما يعتمد على عوامل أخرى ، منها رؤيته هو للشخص صاحب الرأي ، و مدى علاقته به ، و الموقف الذي تم فيه إبداء الرأي (مثلا منفردا أو وسط مجموعة) ، بالإضافة لعوامل شخصية أخرى كالسيطرة على النفس مقابل الاندفاع ، و تعوده على هذه المواقف ، و تقديره لنتيجة رد فعله ، الخ .

و لا أعتقد ان رأي الناس فيك سيتحول إلى قالبا إلا إذا أثبت أنت لهم صواب هذا الرأي ، و إنما يعيد الناس رؤيتهم و يغيرونها حسب الخبرات الجديدة ، و من الممكن جدا أن يحدث الإنسان تغييرات في رأي من حوله فيه إذا استطاع أن يقوم بتغييرات صادقة في سلوكه ، و ليست تغييرات شكلية أو مؤقتة .

و في النهاية أتفق معك طبعا أن المواقف الشخصية أصعب و أدق من مواقف العمل بكثير ، و تأثيرها على شخصية الإنسان و مستقبل علاقاته أعمق تأثيرا .

تحياتي لك

أحمد كمال يقول...

@ بنت القمر
طبعا القبول الاجتماعي ده بكل عناصره اللي ذكرتيها شيء أساسي ، و الدليل على كده إنك ممكن نفسك تتسد (أو تتصد) من واحد غير مقبول اجتماعيا و ده يمنعك تسمعي كلامه اللي ممكن يكون صح فعلا ، و العكس بالعكس ، و الشطارة زي ما قلتي إن الواحد يعامل الناس على قدر عقولهم و ثقافاتهم ، مش بمعنى النفاق ، و لكن بمعنى وضع الشيء في محله الصحيح .

تحياتي لك :)

@ Ahmed Al-Sabbagh
منورنا بجد يا صباغ ، و أتمنى زيارتك دائما ، و أشكرك على شهادة أعتز بها .

@ مع اصرارى
و عليكم السلام و رحمة الله و بركاته ، بيني و بينك أنا كنت ابتديت أقلق ، و أقول دي مش عادة مصطفى ، ده انا حتى سميت ابني مصطفى :)

تسرني متابعتك يا مصطفى ، و أشكرك على طيب كلماتك .

أحمد كمال يقول...

@ موناليزا
بالضبط زي صاحبي اللي كلمتك عنه :) جميل كلامك عن حب العلم ، و يمكن في موقف تاني تفضلي الانتظار ..

تحياتي لك

@ نعكشة
الانطباع الأول الصح ده بيبقى خبرة بتخلي الواحد يشوف حاجات غير الأمور السطحية بتساعده على تكوين رأي أفضل ، لكن أكيد برضه لكل قاعدة استثناء .

تحياتي لك يا عزيزتي ، و مافيش كركبة ولا حاجة :)

norahaty يقول...

السلام عليكم ورحمة الله وبركاته
عفوآ أ. احمد كمال
اسمح لى ان اخالفك فى
راى انت قلته هنا
( و لذلك أنا ساعات بازور مدونة و أقراها و أخرج بدون تعليق إذا لم أجد ما أضيفه لأني لا أحب تعليقات تسجيل الحضور )
لا اوافقك فى هذا فمجرد قولك ولو(السلام عليكم )تبدى نوعآ من الاهتمام او الحضور او حتى السلام لصاحب المدونة
تعلم تصورتك حين قرأت تعليقك هذا وكأنك مررت بمكتبى مثلا (وعينك فى عينى) ولم تهز رأسك بتحية مثلا ونحن مفروض اصدقاء او زملاء فى المدونات فهل يرضيك هذا؟ان تمر بدون السلام عليكم؟
تحياتى لك اليوم وكل يوم وتمنياتى بنجاح حملة التبرع بالدموان تكلل بالنجاح.

يا مراكبي يقول...

الموضوع ده مهم للغاية

ممكن الواحد يكون من الناحية التقنية مستواه عالي جدا .. لكنه غير قادر على إظهار هذا المستوى عن طريق طرق العرض والتقارير المختلفة .. وبالتالي هتلاقي إن الناس مش عارفه إن مستواه عالي تقنيا وممكن يفتكروه أي كلام

وممكن يكون الواحد أضعف في المستوى تقنيا لكنه عنده قدره عاليه على الشرح والعرض وتقديم التقارير .. ده بقى الناس تفتكره إنه أحسن من الأولاني على طول

It is a matter of presentation

وبالتالي لا يمكن إغفال رأي الناس أبدا لأنه جزء من التقييم العام للشخص .. وده لأن التقييم العام لأي شخص بيبقى من خلال عناصر كتيرة جدا مش كلها فنية أو تقنية فقط

في مصر إحنا بنغفل النقطة دي دايما .. وده اللي بيخلي جنسيات أخرى ممكن تكون أقل مننا فنيا هما اللي بيكونوا في الواجهة وفي إدارة الشركات المختلفة في الخليج العربي عموما

Diyaa' يقول...

لأ مش ممكن إنت بتفكر زيي تمام
يعني نفس وجهة النظر..وصديقك صح تماماً
كنت دايماً بعمل زيك ..عندي انديكس في جيبي وكل ما أقرا جملة تعجبني أو أسمعها سواء حكمة أو شعر أو حديث بغض النظر عن صحته بكتبها وبعدين ببحث عنها بعد كده..للأسف ضاعت مني مع جاكت اتسرق ومستعد أسامح اللي سرقه بس يرجعهالي :(
سعيد إني شفتك النهاردة يا أحمد..وأسلوبك في الكتابة بسم الله ما شاء الله جميل وبسيط في نفس الوقت..أتمني أقدر أداوم علي القراية ليك ولباقي الناس الجميلة اللي شفتها النهاردة

أنا ضياء..عملت فيكم تقرير مخابرات تحفة..أسامي وأرقام وصور وزي الفل
هي هي هي
ميلي في البروفايل هضيفك :)
سلام

Saudi Romantic يقول...

السلام عليكم ورحمة الله وبركاته

كعادتك اخي الكريم احمد تتناول التفاصيل في شخصيات وافعال من حولك والاستفاده منها .. موضوعك رائع وهذه حقيقه وليست مجامله وهذا بسبب عشقي للتفاصيل في كل شي .. واريد ان اطلب منك طلب خاص جداً..يا أخي قرأت هذا الموضوع في مدونتك قبل ان يكون هناك اي تعليق ولم اعلق .. وهذا بسبب تناولك للموضوع بشكل شمولي وسمحت لكل الافتراضات بالحضور وقمت بتحليلها بشكل منطقي راائع .. حين كنت اقرأ مقالك ..كنت اقول هذه النقطه سوف اطرحها في تعليقي من وجهة نظري الشخصيه ..وحين كنت اكمل القراءه أجد انك قمت بطرح ما كنت انوي ان اعلق به..أقرأ لك وكأني أقرأ ملف قضيه وأقرأ بهذا الملف الثغرات القانونيه واجد في نفس الصفحات الحلول لهذه الثغرات لهذا اطلب منك ان تترك لنا ما يمكن ان نقوله .. موضوعك اخي الكريم لايحتاج من القاريء تحليل او تفنيد او افتراضات واسنتاجات .. بل يحتاج ( الاشاده فقط ) .

أعجبتني هذه الخلاصه اللتي تفضلت بها

(( و اليوم مازلت أرى أن الانطباع الأول هام ، و أن رأي الناس السطحي مؤثر ، و لكنه ليس الأساس ، و أن الأفضل أن أكون نفسي ، و خير لي أن أبني ثقة من حولي خطوة بخطوة ))

شكراًاخي الكريم على موضوعك الجميل واعذرني في تأخيري وترددي في التعليق فأنا لم أجد ما اكتبه بعدك .

في امان الله

سمر الشافعى يقول...

انا كمان زيك يااستاذ احمد مقتنعه ان ليه اعرض نفسى للاعتراض من الناس فى حين انى اقدر اوصل للى عاوزاه من غير كدا

بوست مميز وان شاء الله اكرر زيارتى لمدونتك

أحمد كمال يقول...

@ norahaty
و عليكم السلام و رحمة الله و بركاته ، خلاص إن شاء الله أسلم كل ما أمر على مكتبك .. قصدي مدونتك :)

@ يا مراكبي
أنا متفق معاك يا هندسة من الناحية العملية ، المظهر اللائق و القدرة على الحديث مدخل هام للحصول على الاهتمام المطلوب و لفت النظر لمحتوى الكلام .

و طالما إنك بتحب الموضوعات دي ، أحب أعرف رأيك في الموضوع الجديد إن شاء الله لإنه حايكون فيه نقط كتير إدارية و عملية .

تحياتي

أحمد كمال يقول...

@ Diyaa
أنا كمان سعيد جدا إني اتعرفت عليك ، و إن شاء نتواصل دايما ، و هارد لك على الجاكيت المفقود .

@ Saudi Romantic
و عليكم السلام و رحمة الله و بركاته ، جزاك الله خيرا يا أخي الكريم على تعليقك الجميل ، و كما ترى فإن العديد من التعليقات التي ترد على الموضوع تضيف إليه الكثير ، و هذا النقاش يثري الموضوع أكثر ، و أرجو أنه يترك له أثرا أكبر عند القارئ ..

و أحييك يا صديقي على الخلاصة التي اخترتها ، فقد كانت الخاتمة الأولى للمقال ، و بها خلاصة وجهة نظري ، ثم رأيت أن أضيف ما بعدها لتكتمل الفائدة .

@ سمر الشافعى
يعني انت عكس موناليزا بالضبط :) أنا شايف إن المزج بين الاتنين هو الأفيد حسب الموقف ، أحييكي .

دعاء مواجهات يقول...

كعادتك أستاذ أحمد:

العمق فى التفكير والموضوع الجذاب والحيادية وعرض وجهات نظر متعددة

انا بقى عن نفسى ساعات بقول ان الواحد لازم يتصرف بطريقة تعجب الناس بس لاقيت انى كدة هرسم وهمثل كتير

فقررت قرار واحد انى اكون حقيقية اكون انا واللى شايف فيا عيب يوجهنى وهقبل دة

واحاول اغير انما التصنع يبقى بكدب عليا مش عليهم.

اما موضوع بقى الإستعجال فى معرفة حاجة مش عارفاها فدة حسب الموقف والناس نفسهم لو هيتقبلوا دا منى او لأ
وحسب كمان قربهم منى

لو قريبين اوى هسال فى لحظتها ومش هيهمنى لو ناس غريبة هحوشها جوايا واسال حد اعرفة او ادور عليها بنفسى ..

تحياتى على المواضيع المتميزة فعلاً.

__________________________

سعدت جداً بلقاء حضرتك

وكنت اتمنى ولو 5 دقائق حوار

بس للأسف حضرتك كنت مستعجل

ان شاء الله تتعوض ..

بجد فرحت اوى انى شوفت شخصية مثلك.

سلااام

شمس الدين يقول...

طبعا يشرفني ان تعليقي يكون من افضل التعليقات اللي وصلتك

و اكيد مش همنانع و دا شئ يسعدني بجد

بس انت هتحصه فين ؟؟؟ :)

أحمد كمال يقول...

@ دعاء مواجهات
الله ينور عليكي ، فعلا اللي بيتصنع بيضحك على نفسه قبل الناس ..

أشكر لك كلماتك ، و إن شاء الله الجايات أكتر من الرايحات :)

@ شمس الدين
أعلى العمود اللي على الشمال نماذج من أفضل التعليقات على الموضوعات السابقة ، و تعليقك نور القائمة .

تحياتي لك .

بسّام الكثيري يقول...

أخي الكريم / أحمد
اشكرك على مقالك ..
لقد استفدت منه ، وكانت قراءة ماتعة .
لقد اثرى المداخلون الموضوع ولم اجد في عجالة وقتي ما اضيف إلا الشكر لشخصك الكريم .
و الله نسأل لنا ولكم التوفيق و السداد .

أحمد كمال يقول...

@ بسّام الكثيري
أشكرك يا أخي على زيارتك و تعليقك ، و أنا ممتن لتعرفي بك ، و أتمنى دوام التواصل بإذن الله .