23 مايو 2008

مدونات مصرية "للقلب"

مدونات مصرية كان اللقاء مختلفا ، أن تلتقي بمن قرأتهم قبل أن تراهم ، هم سكنوا القلب قبل العين ، و كانت مدوناتهم المصرية للقلب ، و ليست للجيب .

الإحساس العام كان إنها حفلة تنكرية ، أشخاص تعرفهم بأقلامهم ، فإذا رأيت وجوههم ظننت أنهم متنكرين ، "انت مين؟ ، "أنا رحايا العمر!" ، "كنت متأكد!" .

الحقيقي و الغريب أني ظننت أنني عرفتهم بوجوههم قبل لقائهم ، فكلما تعرفت على أحد المدونين أو إحدى المدونات أخذت أفكر بدون أن أفصح "أظن أنني أعرفه من قبل .. لست أدري أين أو متى" ، غاب عني وقتها أن القلوب تلتقي عند ربها ، و لابد أن هذا هو التفسير الحقيقي ، فحتى الآن أحاول أن أتذكر أين و متى قابلت أصحاب مدونات إنكسارات ، يا مراكبي ، عصفور المدينة ، لماضة ، و غيرهم و غيرهم من قبل .

لقد سعدت باللقاء بغض النظر عن الأسماء التي نشر لها و التي لم ينشر لها ، و أكثر ما أسعدني هو معنى الحدث ، و الذي أرجو أن يكون بداية ثورة فكرية في بلادنا ، فنرى أيضا مدونات للجيب أردنية ، و سعودية ، و عراقية ، الخ . و أقول بداية ثورة فكرية لأن الفرصة جاءت لكي يدلي الجميع بدلوه ، و ليقرأ الناس رأيا و فكرا مختلفا بعدما تعودوا على الرأي الواحد و الفكر الواحد ، و لتكون لدينا ثقافة اختلاف و حوار ، و لنبدأ في أن نفكر لأنفسنا و لا ننتظر أن يفكر لنا أحد ، و لنبدأ عملية الإصلاح بحركة فكرية و التي هي الأساس المحرك لأي حركة أخرى موازية .

مبروك للمدونين خروجهم من الفضاء الرقمي إلى الفضاء الواقعي .

هناك 33 تعليقًا:

عصفور المدينة يقول...

انت جميل بجد بجد يا أستاذ / م أحمد ربنا يبارك لنا فيك فعلا أنا حسيت إني أعرفك من زمان أنت بشوش جدا وأحسست بألفة تجاهك

شــــمـس الديـن يقول...

سبحان الله

عارف حضرتك ... و الله بجد الجو بتاع الجفل كله كان بيشع ود و الفة بلا حدود

بس المشكلة بقي
اني بتعب من الزحمة و الحر ... و حتي لو استحملت الزحمة و الحر - زي ما قعدت لفترة في الحفل - المشكلة في سوء التنظيم فانا مكنتش اعرف البروجرام بتاع الحفل اصلا و ان اسمائنا هتتنادي فحسيت اني مش فاهمة حاجة و خاصة ان الصوت مكنش باين ...فانسحبت بهدوء

انا علي فكرة بجد زعلت اوي ان سوء التنظيم خلاني مش اشوف او اتشرف بناس كتيرة
عرفت ان حضرتك و الاستاذ عصفور و الاستاذ احمد شقير و غيرهم كانوا موجودين و لكن لم يتسني لي التشرف بهم :(((

بس ازاي حضرتك كنت جنب الاستاذ القاضي رغم اني شاورت له و مضي لي علي الكتاب و انا مضيت له عليه !!!!

معلش بقي تتعوض - رغم اني مش من المؤمنين بالمقوله دي لان كل فرصة في حد ذاتها لا تعوض - اليوم اللي بيمر مش بيرجع

عامة ان شاء الله تعالي لو فيه ندوات مناقشة للكتاب اكيد هيكون فيه تنسيق بين المدونين كي يحضر اكبر عدد منهم

قدر الله و ماشاء فعل :)

مـحـمـد مـفـيـد يقول...

سعدت يا اخي بالتعرف عليك رغم قصر المده التي جمعتنا
ولكني سأتابعك هنا دائماً بأمر الله علي أمل ان نلتقي قريباً

لماضة يقول...

والله يا استاذ احمد انا ما كنت عارفهاودي وشي منك فين بصراحه
هههههه
خصوصا واصراري برضه اني اعرفك نفس الاحساس اللى عندك
حقيقي كنت سعيده جدا اني شفت حضرتك

Tamer Nabil يقول...

ازيك ياعم احمد كان نفسى اتعرف عليك

بس مفيش نصيب

لماتيجى عندى هتعرف انى كنت قاعد غلبان وفى حالى والسبب انى عامل عملية فى رجلى من ستة شهور

الحمد الله على كل شىء

اتمنى اشوفك فى المرات القادمة

تحياتى

دنــــيــــــا مـحـيـرانـي(ده حالي اما اسمي ايناس لطفي يقول...

سعيدة بتعرفي علي حضرتك الحفله ديه خلتني اشوف ناس بحترم كلامهم جدا و افكارهم رغم اني قلة التعليق من جانبي
واوفق الراي ان الكتاب لازم يتغير اسمه و يكون مدونات مصريه للقلب فعلا
عشان حاله السعادة و التعارف الكبيره الاي كانت محوطه المكان و الاشخاص خلتني احس ان قلوبنا و اروحنا كلنا كانت تعرف بعض من اجمل لحظات حياتي وجودي بينكوا و تعرفي عليكوا في هذا الحفل الرائع
تحياتي

قوس قزح يقول...

يا خسااارة
كان نفسى اتعرف عليك
بس المكان صعب اوى و مش مناسب لحفلة زى دى
بس بجد اللقاء ده يثبت ان لازم يكون فى لقاءدورى للمدونين علشان يعرفوا بعض اكتر

la3lahakhier يقول...

انا ماروحتش
بس حاسة طبعا باحساسكم
بس تصور انى كنت خايفة اشوفكم واشوف الناس اللى عرفتها ورسمتلها صورة فى خيالى كنت خايفة احس انى نزلت للواقع
فى التدوين كل واحد له كيان هلامى وهمى كبييييييير لو نزل على ارض الواقع كان حيبقى ممكن متحجم اكتر
سعيدة جدا لكم كلكم وسعيدة انى عرفتكم
كل التحية

محمد إبراهيم محروس يقول...

الحقيقة سعيد جدا
بحجم التدوين على هذا اللقاء
في أكثر من مدونة
وسعيد بهذا الشعور المتبادل
بالحب والعطاء
خالص تحياتي لك
وخالص تحياتي للجميع

فاتيما يقول...

أستاذ أحمد
أنا إتشرفت بسلامى عليك و إن كان خاطف
بس إنت فيك سماحة كدا و متتخيرش عن عم مراكبى فى الذوق و الأخلاق
طبعاً بحقد عليك حقد شنيع عشان قعدت جنب مرابى نبع الحكمة بتاعى ...
و طبعا أتكلمتوا فى كلام من أمعاق المعاميق و كان نفسى أرمى ودانى عشان أسمعه بس ملحوقة و المرة الجاية هيحصل و إنت اللى هتحقد عليا
فرصة سعيدة إنى جيت هنا
و ان شاء الله هآجى كتير
تحياتى

Sampateek يقول...

الف مبروك
عقبال العدد المليون

تحياتي

mohammed alsha3r يقول...

كان يوم جميل بوجود المدونين
وبوجودكم
بس مش بوجود الجو الحر اللى كاد يقتل الواحد

وان شاء الله مش اخر مرة نتلاقى فيها وان شاء الله يكون فى ساقيه الصاوى

رفقة عمر يقول...

ماشاء الله بجد
انا على فكرة خجوله وبخاف من التجمعات مش باعرف اعمل فيها ايه بجد حمستونى ان ان شاء الله المرة الجايه احضر الاحتفاليه الجميله دة
دايما يارب الود دة يستمر

appy يقول...

بجد انا مكسوفه من نفسى انى مش عرفتك من الصورة بس والله كنت بشبه على حضرتك اسفه خالص
بس اتبسطت انى شوفتك بجد ويا رب نتقابل تانى فى مكان اوسع ويتحقق حلم كبير بتغير البلد

Whispers just for a Night يقول...

موعدنا غداً لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

حزيــــــــــــــــــن يقول...

لم يسعدنى الحظ بالتعرف على حضرتك
اتمنى ان نلتقى مره اخرى
احمد مهنى

أحمد كمال يقول...

@ عصفور المدينة

أنا اللي اتشرفت بجد بمعرفة حضرتك ، إنت كنت أحد أبرز نجوم الحفل ، و تأثيرك واضح على كل من حولك ، و النماذج اللي زي حضرتك هي اللي بتخلي عندي أمل كبير إن ربنا حافظ الخير في الأمة دي .

@ شمس الدين

قدر الله و ما شاء فعل ، أنا لحسن حظي قابلت و اتعرفت على ناس كثير بدون سابق تخطيط ، لكن يمكن ماقدرتش أتعرف على ناس كثير أيضا بسبب ضيق المكان و لقلة التنظيم . أما بالنسبة للحر فعندك حق ، أنا استحملت بس لأني يمكن كنت في أول صف و كنت مركز مع الكلمات ، ده غير صحبة الأستاذ المراكبي :)

الأهم نشوفك دايما في المدونة إن شاء الله :)

أحمد كمال يقول...

@ محمد مفيد

إنت واحد من الناس اللي كان نفسي أقابلهم ، و ربنا يكرمك أحسست بالألفة تجاهك ، و إن شاء الله يكون في لقاءات أخرى عديدة

@ لماضة

أنا أسعد يا دكتورة ، و حقيقي كانت فرصة أشوف اللماضة بعد ما قريتها :)

بالمناسبة هو أنا المفروض أصرف المدونات اللي كتبتيها لي ثاني لما تخلص ؟ ولا في أمل أخف ؟

أحمد كمال يقول...

@ تامر نبيل

ألف سلامة عليك يا تامر ، شفاك الله لابأس طهور إن شاء الله . مجيتك و إنت تعبان كده عزيزة جدا ، لكن معلش أنا الخسران ، و تتعوض إن شاء الله ..

@ إيناس لطفي

أشكر حضرتك شكرا جزيلا على الإهداء الجميل و الكتاب الرائع ، و أرجو أن أرى تعليقاتك في رحايا العمر .

ملحوظة : أحتفظ بحق الملكية الفكرية لإسم "مدونات مصرية للقلب" :)

أحمد كمال يقول...

@ قوس قزح

بقى حضرتك كمان كنتي موجودة ؟ أنا كل شوية أكتشف إن فاتني ناس كثير كنت أعتز جدا بلقائهم . أرجو إن يكون في لقاءات جديدة إن شاء الله ، و عموما تتعوض في إن شاء الله ..

@ لعلها خير

صدقيني كل واحد من الشخصيات المحترمة في التدوين كان أكثر تألقا و تشويقا على الحقيقة ، و يمكن كان حظي كويس إني قابلت ناس أعتز بهم فعلا ، و ده يؤكد فكرتي اللي قلتها في التدوينة الثانية في رحايا العمر من فترة طويلة .

تحياتي

أحمد كمال يقول...

@ محمد إبراهيم محروس

عندك حق ، الموضوع كله زي ما يكون مظاهرة تدوينية كيرى ! بس الحمد لله التجمهر ماتمنعش في أي مدونة من المدونات الرئيسية :)

@ فاتيما

و الله مافيش معا .. معا إيه؟ معااااميق ولا حاجة أبدا ، و بلاش حكاية الحقد دي من فضلك ، إن شاء الله حابقى أكتب هنا أمعق المعاميق اللي اتقالت ، و مش حتاخد خمسين ستين بوست :)

أحمد كمال يقول...

@ سمباتيك

عليا بالعدد مليون و واحد !

زيارتك شرف لينا :)


@ محمد الشاعر

ساقية الصاوي تبقى فكرة جميلة فعلا ، ربنا يكتب لنا اللقاء قريبا ..

أحمد كمال يقول...

@ رفقة عمر

لازم تحضري في أقرب فرصة إن شاء الله ، و شكرا على الزيارة

@ آبي

ولا يهمك أنا كمان ماكنتش عارفني من الحر و الزحمة ، و بعدين إنتي كنتي في السنتر من الحفلة و قابلتي ناس كثير .

المرة الجاية إن شاء الله أتعرف على الباشمهندس :)

fahd يقول...

حلو قوي موضوع الفضاء الواقعي ده

انا سعدت كثيرا برؤيتك والتعرف عليك

صدقني كان اللقاءممتعا

عندما سقطت الاقنعة الالكترونية

وهذا التناقض المحبب للنفس اعرفه ولا اعرفه

اعرفك عبر الاثير ولا عرف لا اسمك ولا شكلك

شيء ممتع


وانا حبيتك والله

معندكش بنتوته حلوه للجواز

أحمد كمال يقول...

@ Whispers just for a Night

كان نفسي تقول أي حاجة تشرح لنا بيها المطلوب عشان اللي مش حايروح مدونتك يفهم ، و كان نفسي تحسسني إن الإعلان ماوقعش منك هنا غلط .

@ أحمد مهنى

إحنا بقى كلنا اتعرفنا عليك يا أبو حميد :) شكرا على مجهودك و مبروك النجاح .

لنا لقاءات و متابعات إن شاء الله ..

أحمد كمال يقول...

@ فهد

أنا كمان سعدت بمعرفتك جدا يا فهد :)

و كنت عايز أطلب منك خدمة ، كان في مدونين واقفين معانا و قالوا إنهم مشتركين في مدونة تجمع أطياف من أقصى اليمين لليسار ، و وعدتهم أزورهم و لكن للأسف نسيت إسم المدونة ، يا ترى إنت عارفها؟

على فكرة أنا عندي بنوتة حلوة و الحمد لله ، بس في الحالة دي حاعوز أعرف إنت بتشتغل إيه و بتقبض كام و و .. ماتخلينا اصحاب أحسن؟ أنا مش الشيخ طلبة !

صباح الخير يا مصر يقول...

رحايا العمر
***********
اعتقد ان فى نوع جديد من الاخوه و الصداقه ....هو الاخوه و الصداقه الالكترونيه
تحياتى

أحمد كمال يقول...

@ صباح الخير يا مصر

متهيألي إنها نفس نوع الصداقة ، لكن الفرق إن هنا مافيش ظروف تفرض عليك اختيار أصدقاءك ، و إن هنا مافيش أقنعة شكلية ، كلها أقنعة فكرية :)

فاتيما يقول...

إيه دا ؟؟
خمسين ستين بوست بس ؟!!
طب يللا مستنيناهم
و على فكرة أمعاق دى كلمة من إختراع عمنا محمود السعدنى ربنا يخفف عنه
يا رب
وإشتقها من كلمة الاعماق عشان يقول الواحد بيوصل لأعمق مكان فى الموضوع
يبقى وصل لأمعاق المعاميق ...
و خلاص بلاش الحقد مدام مزعلك كدا نمشيها غل بس

شرويت يقول...

مدونة حلوة جدا اتمنى لكم النجاح

un4web يقول...

مشكووووووووور
http://www.alsadiqa.com

بنات فري يقول...


موضوع شيق .. جزاكم الله خيرا
بنات فري مدير موقع

شات بنات روشة ، دردشة بنات روشة ، بنات روشة ، منتدى بنات روشة ، بنات روشة ، صور بنات روشة ، بنات مصر ، بنت مصر ،شات بنات مصر ، شات بنت مصر يقول...

مشكور جدا موضوع رقيق