17 مايو 2008

الحب في الله

قال : إني أحبك في الله

قلت : أحبك الذي أحببتني فيه ، بس مانا عارف

قال : عارف إيه ؟

قلت : إنك بتحبني في الله

الحب في الله

قال باسما : طيب و عرفت إزاي ؟

قلت : لأني أنا كمان أحبك في الله

قال : و هو شرط ؟

قلت : إنت ماتعرفش إن الحب في الله ده معجزة من ربنا ، و إنه من علامات وجوده سبحانه و تعالى ؟

قال : لأ اشرحها لي دي

قلت : شوف يا سيدي من نعم الله سبحانه و تعالى إنه يجعل القلوب المتحابه فيه تتبادل الحب ده و ميتغيرش فيها ، فتلاقي اللي انت بتحبه في الله بيحبك برضه حتى لو لسة متعرفين حالا .

قال : قصدك إيه إنه يخلي الحب مايتغيرش في قلوبهم ؟

قلت : جميع أنواع الحب بتكون مرتبطة بحاجات طارئة و متغيرة إلا الحب في الله ، يعني اللي بيحب عشان الجمال حبه يتغير مع الأيام لأن الجمال بيروح ، و اللي بيحب عشان الصحبة حبه يتغير مع البعد ، و هكذا ، لكن اللي بيحب في الله حبه يفضل ثابت لأنه مرتبط برب العرش .

قال : انت عندك حق فعلا ، يعني إحنا مثلا مش بنتقابل غير نادرا ، و لا حتى بنتكلم في التليفون غير كل كام شهر ، و مع ذلك دايما لما نتكلم أحس إننا كنا لسه مع بعض ، مش باحس بالجفوة و التغيير زي ما باحس مع ناس تانية ..

قلت : و أنا دايما أفتكرك لما أدعو لإخواني و أحبائي في الله .

قال : سبحان الله ، أنا كمان نفس الشئ ، يا أخي الحمد لله على نعمه الظاهرة و الباطنة ، و ربنا يديم الحب ده بيننا ، لكن انت عرفت الحاجات القيمة دي منين ؟

قلت ضاحكا : صلي على النبي .. أنا مرة قلت لواحد عزيز قوي على قلبي إني أحبك في الله فقال لي : أحبك الذي أحببتني فيه ، بس مانا عارف .. فقلت له عارف إيه ؟ .. قال لي عارف إنك بتحبني .......

هناك 15 تعليقًا:

mostafa rayan يقول...

وانا كمان بحبك في الله

Empress appy يقول...

فعلا كلامك مظبوط كل حاجه متغيرة الا الحب فى الله
حتى فى دنيتنا مفيش حقيقه واحده صح ولا نعرفها الا الله سبحانه وتعالى كل شئ قابل للتغير الا هو
تسلم ايديك

عاشــــــ النقاب ـقــــة"نونو" يقول...

السلام عليكم
اللهم ارزقنا حبك يا الله وحب من احبك يارب العالمين
تدوينة رائعة بارك الله فيك
تحياتي

Unknown يقول...

بارك الله فيك. وأنا كمان بحبك فى الله. حسن سليمان

Ahmed Kamal يقول...

@ مصطفى ريان

أحبك الذي أحببتني فيه يا مصطفى ..

@ appy

و لأن هو الحقيقة الوحيدة الأكيدة ، لازم نبني حبنا و معارفنا و أفعالنا و حياتنا كلها على المؤكد من شرعه و سنة نبيه ، و الباقي نجتهد فيه ..

تسلمي

@ أم يوسف

و عليكم السلام و رحمة الله
آمين يا رب
أشكرك و بارك الله فيك

@ حسن

أحبك الذي أحببتني فيه يا حسن ..

قابلت صديقي هذا منذ أيام بالصدفة بعد انقطاع شهور كالعادة ، قال لي : أتذكر حديثنا عن الحب في الله ؟ فقلت له : لأ انت تقرأ المدونة بتاعتي بقى ..

غير معرف يقول...

جميل أوي البوست ده... ربنا يحبب فيك خلقه...

Ahmed Kamal يقول...

@هنا و هناك

ربنا يكرمك ، و شكرا على الزيارة

Nihal يقول...

إن حب الله لا يعادله أى حب آخر ، فرغم تقصيرنا و أخطاؤنا التى لا تنتهى إلا أن رحمته و سعت كل شىء ، و أنا عن نفسى كلما أخذتنى الدنيا بمشاغلها و مشاكلها ،عادة ما أتذكر قوله تعالى (من تقرب منى شبرا تقربت إليه ذراعا ، ومن تقرب إلى ذراعا تقربت إليهباعا ، و إن أتانى يمشى أتيته هرولة ..) فأسرع إلى الصلاةو شكره على نعمه الكثيرة التى لا تحصى، و أبواب رحمته التى تنتظر عودة عباده الخطائين ليغفر لهم !

Ahmed Kamal يقول...

@ نهال

جزاك الله خيرا على التعليق ..

dodda يقول...

الله
كلامك جميل
مصداقيه
العفويه

ربنا يجمع قلوب المسلمين على الحب فى الله

Ahmed Kamal يقول...

@ dodda

شكرا على زيارتك و على تعليقك ، أتمنى نراك دائما إن شاء الله

د. محمد رضا يقول...

كلامك جميل والله

تسلم ايدك

تقبل مروري يا ابن مصر الاكرم

Ahmed Kamal يقول...

@ د. حمود

زيارتك غالية علينا ، نورت رحايا العمر و إن شاء الله نشوفك دائما

غير معرف يقول...

علي فكرة الموضوع ده عجبني جداو في غاية الروعة بس انا عندي مشكلة انا حبيت واحدة في الله وقلتلها اني بحبها في الله بس طلعت ماتعرفش معني الحب ده و قالتلي و فيها ايه انك بتحبيني حاجة عادية يعني و ماهتمتش بكلامي و خدته علي اساس موضوع عادي انا دلوقتي مش عافة اعمل ايه يعني انا اخترت غلط ولا انا اللي مش عارفة اتصرف ولا اكلمها ياريت حد يقولي او يساعدني اختكم في الله نورهان

غير معرف يقول...

واااو