20 يونيو 2008

واجب الأسرار

واجب الأسرار

فوجئت بهذا الواجب يقتحم علي مدونتي ، تشاغلت و راوغت ، و لكنه باغتني من جديد : "عليك واجب" ، قلت إنا لله و إنا إليه راجعون ، علي أن أرضى بما ليس منه بد . و هكذا أجد نفسي الآن أقدم إليكم بكامل إرادتي الحرة : واجب الأسرار .

قوانين الواجب :

1. أذكر اسم من طلب منك حل هذا الواجب.

سامحها الله لعلها خير هي السبب ، و سامح الله من أرسل إليها الواجب من قبل عاشقة النقاب .

2. أذكر القوانين المتعلقة بهذا الواجب

حدث بالفعل .

3. تحدث عن ستة أسرار قد لا يكتشفها من يقابلك للمرة الأولى.

طبعا لن يكتشفها !

1- فهذا هو أول سر ، يصفني من يعرفني لأول مرة بأنني متحفظ ، و لا يعرف أنني أحب البساطة في التعامل .

2- لا أحب المجاملات ، إطلاقا . أحس أن التكلف يفسد العلاقات ، و لا أحسن المجاملة أو الإلحاح ، فيحسب الناس أني غير ودود ، أو غير متجاوب معهم .

3- مدمن كتب ، و لا أنام بدون قراءة ، مما يؤخرني في اليوم التالي أحيانا .

4- يبدو علي الهدوء عادة ، و لكنني أحتفظ داخلي بأكبر قدر ممكن من الثورة التي لا تبدو على السطح .

5- أحرج جدا من إحراج الناس ، فاضطر أحيانا إلى الاستمرار في الاستماع إلى حديث ، أو المشاركة في موضوع لا يهمني كثيرا في الحقيقة ، فقط لكي لا أحرج صاحبه .

6- مستعد أن أفعل أي شيء ، أؤمن أو أقتنع به .

4. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.

هذا هو الجزء الجميل في الموضوع ، و لأنني أحب الإنصاف جعلت أسلوب الاختيار عدد التعليقات في مدونتي ، و بالتالي القائمة التالية هي قائمة الأكثر تعليقا في رحايا العمر ، و أطلب منهم مشكورين أن يحلوا واجب الأسرار بدورهم :

- آبي صاحبة الكوكب الشهير

- norahaty صعبان عليها حالنا

- هنا و هناك فاتح أبواب الحياة

- شمس الدين ربة السيف و القلم

- قوس قزح الشخصية الملونة

- مصطفى مع إصراري أنظر ماذا فعلت رحايا العمر بمصطفى

5. اترك تعليق في مدونة من حولت الواجب عليهم، ليعلموا عن هذا الواجب.

سيتم إخطار الضحايا في أقرب وقت ممكن إن شاء الله .

و بعد ، كل واجب و انتم طيبين ، و مانجيلكمش في واجب :)

هناك 23 تعليقًا:

la3lahakhier يقول...

هههههههههه
يلا بالشفا

كدا احنا عرفنا المستخبى طاب اللى باين ايه؟
على فكرة القراءة ادمان اسالنى انا بس انا طلعت اشطر منك وحددت مواعيد نوم قاسية فى ايام الشغل وفى العطلات حتى لايختلط الحابل بالنابل واتاخر تانى
دمت طيبا اخى الكريم واشكر لك الاستجابة

norahaty يقول...

السلام عليكم ورحمة الله وبركاته
أ.احمد كمال**
كده برضه؟؟؟؟
ده انا بعّزك!! واقول عليك كل شىء طيب تعمل كده!!
كان فيه اغنية قديمة للطفلة فيروز فى (فيلم فيروز هانم) بتقول
مكانش والله العشم تعمل كده ياحسين(احمد)
اللى بنيته فى زمن يروح فى غمضة عين(اهأ) (أهأ)(أهأ)
هذا بكاء لو مش واخد بالك
وعلى العموم انا والحمد لله عندى اتنين من اللى حضرتك اهدتنى اياه احطهم مع بعض فى الخزنة وان شاء الله امخمخ وامخمخ
وامخمخ لما الاقى حل للمشكلة دى.
نورتنى وشرفتنى واكرمتنى ياأستاذ بهذا الاختيار
norahaty

مع اصرارى يقول...

واجب الأسرار
إختيارك للعناوين دائما جذاب.
ده سر سابع من أسرارك التى تعجبنى جدا.
بمعنى أصح إنك جذاب من أول وهلة.

سعدت جدا إنى لحقت مركز سادس فى التعليق على مدونتك بس عندى استفسارين.
هل هذه هى الست مراكز الاولى فى التعليق ام إنها كذلك بعد حذف من سبق لهم تمرير هذا الواجب.

كيف يمكننى فرز التعليقات الخاصة بمدونتى؟

أخيرا اشكرك على تمرير الواجب وإن كان لا شكر على واجب.

عصفور المدينة يقول...

جزى الله خيرا من مرر إليك هذا الواجب أن عرفنا أكثر على شخصيتك الرائعة طب أقولك على حاجة أنا لمحت عبارة من أكثر العبارات التي أحب سماعها في حياتي رغم أنك لم تضعها في التاج

"ولأنني أحب الإنصاف"

kochia يقول...

حلوة اوي حكاية الواجب دي
بس كان باين عليك انك بتحب البساطة في التعامل
وكان باين عليك بتحب القراءة
وكان باين عليك انك بتعمل غالبا اللي مقتنع بيه
بس المعلومة برده زياده توكيد

الباقي جديد
تحياتي

بنت القمر يقول...

طب الحمد لله انا خارج قائمه الاعلي تعليقا
بس أحب اقول لحضرتك التدوين ما فيهوش اي واجب مع احترامي لكل من مرر ليك الواجب
قد يستهويني تاج واكون في حاله مزاجيه تساعدني علي الحديث عن نفسي
وقد لا يستهويني اسلوب التاج فاكبر دماعي او انسي تحت ضغوطات الحياه مثلما تنسي سهوا الرد علي رساله بريد اودفع فاتورة تليفونك
:))
وعموما كل ما نتكتكه علي الكي بوردات هو حديث عن انفسنا حديث يرسم صورة الجالسون وراء الشاشه
حتي لو كان مجرد اختيار قصيده او كتابه يوميات باهته
فذلك ما يربطني باصدقائي الاليكترونيين وهكذا اعرفهم كل منهم بشكل محدد
تحياتي

فاتيما يقول...

طب أنا لما شوفتك لأول مرة ملقتيكش متحفظ و لا دياوله
بالعكس كنت ودود جدا
و عرفتنى بنفسك بمنتهى الشياكة يعنى أنا اللى كان منظرى عيضة و أنا سامعة إسم مدونتك ضحايا بدل رحايا
يادى الكسوف
الست حاجات اللى كتبتهم أزعم إنى عارفة بالويم كدا خمسة منهم
من الدقايق البسيطة اللى سلمت عليك فيهم
مش فراسة منى و لا حاجة بس إنت إنسان بسيط و واضح
إنت بتخم على فكرة و قايلنا أسرار فشنك ...
عموماً عذرك معاك عشان التاج دا مرعب أصلاً لأى حد
تحياتى يا أستاذ

أحمد كمال يقول...

@ لعلها خير

خلي اللي باين لواجب تاني ! برافو عليكي تحديد مواعيد النوم القاسية ، من الواضح إنك نجحتي مع القراءة لكن التدوين .. لأ :)


@ norahaty

و عليكم السلام و رحمة الله و بركاته ، بلاش تاخديها بشكل شخصي ، كل الموضوع إنك تقدمتي في سباق التعليقات الفترة الماضية ، و كان "واجب" مكافأتك ، منتظرين المخمخة ..

أحمد كمال يقول...

@ مع إصراري

تشكر يا درش على ذوقك ، هذه هي بالفعل قائمة الأكثر تعليقا على رحايا العمر وقت كتابة الموضوع ، بدون أي فلترة ، و سعادتك كنت بالضبط الرابع مكرر :)

أما عن فرز تعليقات مدونتك فالشرح يطول ، و ممكن أقولها لك على الإيميل أوقع ..

منتظرين "مع اصراري" تتحول إلى "مع اسراري" :)

أحمد كمال يقول...

@ عصفور المدينة

جزاك الله خيرا يا أستاذنا على تعليقك الجميل ، أصل حضرتك دايما تستخرج الدرر ، و "للإنصاف" انت حاتكون هدفي في أقرب "واجب" إن شاء الله :)


@ kochia

يعني إنتي و فاتيما طلعتوني واضح خالص كده ؟ ده بس علشان انتم مش اول مرة تعرفوني ، و قرأتم كلام من اللي كتبته ، لكن غير كده نو واي !

تحياتي :)

أحمد كمال يقول...

@ بنت القمر

حضرتك يا دوب على أعتاب قائمة العشرة الأوائل من حيث عدد التعليقات ، لكنك على رأس قائمة أخرى أعدها حاليا ، و ستريها قريبا بإذن الله على رحايا العمر .

طبعا التدوين مافيهوش واجبات ، و لذلك قلت أني أقدمه إليكم "بكامل إرادتي الحرة" ، و صدرته لباقي الإخوة في صورة إحراج أدبي :) أرجو أن يكون مقبول ..

أما ما نكتبه في المدونات فليس بالضرورة عن أنفسنا ، و لكن درجة الذاتية تختلف حسب الموضوعات و الأسلوب ، و لكن الثابت أن الموضوعات على اختلافها تعبر عن فكر كل منا ، و وضوح الفكر في الكتابة و اتجاه هذا الفكر هو الذي يجعلنا نعرف أصدقاءنا الإليكترونيين على حد تعبيرك ، و بالنسبة لي تتضاءل الفروق الشكلية و الشخصية (التي هي متشابهة في جل الأحوال) بجانب الفكر ..

نورتينا :)

أحمد كمال يقول...

@ فاتيما

موضوع ضحايا العمر ده ضحكني جدا وقتها ، لأني تخيلت إنك بتفكري في إني مجرم تائب مثلا و بكتب عن الضحايا بتوعي ..

بقى أنا أسراري فشنك ؟ ماشي يا ستي هو أنا حاعرف أكتر منك ، لكن تعليقك ده فكرني بقصة اسمها "أبو الهول بلا أسرار" لأوسكار وايلد عن شخصية تفقد كل بريقها بمجرد معرفة سرها ، و لذلك حافضل مخبي شوية حاجات كده لزوم البريق :)

mostafa rayan يقول...

دة احلي واجب
تحياتي لك

واحدة مفروسة يقول...

هيه غيه الحكايه هو انا كل ما ادخل مدونه الاقي واجب
هيه مش الامتحنات خلصت؟؟!!
بس الصراحه الواجب اللي انت حلينه شكله كده صح
بس مش حقدر احط علامه غير لما ربنا ياذن و انضم لتجمع من تجمعاتكم
يس واضح من كلام فاتيما ان الواجب صح

سلام

قوس قزح يقول...

كده يا احمد ؟؟ تخضنى كده على الصبح ؟؟
و انا اقول ايه اللى حصل ؟؟
ماشى
اكيد هشوفك فى يوم من الايام و استحمل بقى :)
اما اروح افهم ايه حاجة الواجب دى
و ميرسى عليه مقدما

لماضة يقول...

انا جيت اهو
هممممممممم
لا بس التاج ده مفيهوش لما ضة خالص
المفروض يزودوا ليه سؤال سر حياتك الاكبر
كده تبقى تمام يعني
امال يبقى واجب ازاي
بس عاوز الحق
انا حطيت قلبي على ايدي لما شفت الاسئلة
اجابتها صعبه جدا
بجد الله ينور يا هندسة

!!! عارفة ... مش عارف ليه يقول...

شد حيلك
كلنا لها

اقعدوا بالعافية

أحمد كمال يقول...

@ مصطفى ريان

شكرا على الزيارة


@ واحد مفروسة

الواجب صح فعلا ، بس لا تعتمدي على كلام فاتيما يا ميس :)

تحياتي

أحمد كمال يقول...

@ قوس قزح

ماكانش قصدي أخضك و الله ، بس ماحبتش أعمل شوشرة وسط كل ألوان الطيف اللي عندك ، قلت كفاية الأبيض :)


@ لماضة

يا مرحب بالتلفزيون ، طبعا يا دكتورة ماباقيناش عارفين نكلمك بعد البث الحي و المباشر مع مستر شريف ، عموما كويس إني لحقت إهداء من قبل الشهرة و المجد ، أنا حاسقعه و أكيد ثمنه حايبقى في العالي مع الوقت :)

أنا مارضيتش أدخلك في واجب الأسرار علشان مقدر دوشة المعجبين بعد إعلان إتجوز دكتورة ، لكن شايلك للثقيلة :)


@ عارفة .. مش عارف ليه

الله يعافيك !!

appy يقول...

ليه كده بس يا بشمهندس بس ربنا يسامحك دا انا التاجات عندى صدت خالص بس دى عجبتنى قوى

لا أحب المجاملات ، إطلاقا . أحس أن التكلف يفسد العلاقات ، و لا أحسن المجاملة أو الإلحاح ، فيحسب الناس أني غير ودود ، أو غير متجاوب معهم .

تسلم بجد

أحمد كمال يقول...

@ آبي

مانا عشان كده مارضيتش أبعث تاج ، ده واجب !

تحياتي :)

نونو يقول...

والله انا شاطرة
التاج دة قربنا اكتر من بعض
عرفنا عنك 6 اسرار بحالهم
ربنا يعزك يارب
الواجبات جاية كتييييييير ما تقلقش
تحياتي

أحمد كمال يقول...

@ نونو

ماشي يا ستي ، بس من فضلك كفاية واجبات ، عايزين نصيف بقى :)